من هي ذاتي ؟؟؟
- هي أنا
انت عارف مين انت ؟؟
اه طبعا انا فلان الفلاني بشتغل كذا وعمري كذاوساكن في الحتة الفلانيه
ممتااااااز
وايه كمان ؟؟
مؤهلي كذا وحاصل علي دورات في كذا وشغلت مناصب كذا وكذا .
ممتاز
وايه كمان ؟؟
هو ايه اللي وايه كمان ايه كمان ؟؟؟
ايوه ايه كمان
انت مين ؟؟
عيوبك ايه ؟؟
ااااه تقصدي كده
انا بقي عيوبي اني عصبي شويتين بس قلبي طيب وبسامح علي طول بطلع اطلع وانزل علي مفيش .. في بيقولي اني صوتي عالي شويه بس عادي يعني مش عيب جسيم قلوق شويه .... يعني مفيش حد خالي من العيوب .
ممتااااز
وايه مميزاتك
مانا قلت طيب وبسامح علي طول واطلع اطلع وانزل علي مفيش
ممتاز
هو مين اللي قالك انك كده
افندم !!!
ايوه قولي مين اللي قالك انك كده
تقصدي ايه ؟؟؟
مين قال انك عصبي
انا فعلا عصبي بتعصب كده وبتنرفز وبضايق لأتفه الأسباب وممكن اخد قرار وارجع فيه بس علشان انا طيب
الحوار اللي فوق ده كلنا بنعيشه انا عيوبي اني واني واني ومميزاتي كذا وكذا وكذا
لكن مش بنسأل نفسنا مين اللي وصف العيوب دي ومين برضو اللي منحك المميزات دي لشخصك .
مشكلتنا الرئيسية في حياتنا اننا بنستعين بالآخرين في وصفنا ... ايوه
طيب ماهو الناس اللي شايفاني انا مش شايف نفسي
هاااايل
طالما انت مش شايف نفسك يبقي انت مش عارف انت مين بالضبط .
ايووووووووه
هو مين يعرف تفاصيل شقتك انت ولا الناس ؟؟
انا طبعا .. انا اللي عايش فيها وحافظ جدرانها .
يعني تفاصيل شقتك وجدران شقتك عارفاها ومش عارف نفسك !! طيب ازاي ؟؟
لا دي حاجه ودي حاجه
لا ياعزيزي دي هي هي نفس الحاجه بس الفرق ان نفسك ومعرفتك بيها اهم من شقتك
تعالي كده واقعد بينك وبين نفسك وصارحها بعيوبها .
علي فكرة انت ممكن متكونش عصبي بس في ناس حكمت عيك انك عصبي فأنت صدقت علي نفسك انك عصبي وممكن جدا اللي زرعلك الفكرة دي شخص هو نفسه عصبي بس عمل انعكاس للصفة دي عليك وطبعا سيادتك مسكت فيها فبقيت كده ووظفت كل مهاراتك العقلية اللاواعية علشان تأكد الصفة دي فيك .
طيب ما انت تقدر تغيرها .
ايوه تقدر ... معلش يعني هي عربيتك مين اللي بيسوقها ؟؟ انت
طيب لو سبت حد تاني يسوقها لازم هيحصل لها حوادث ولو نجت يبقي الحمدلله اللي ساقها ده اتقي ربنا فيها .
العربية شبه نفسك ونفسك شبه العربية
انت اللي بتسوقها انت اللي بتقول مميزاتي كذا وعيوبي كذا وعيوبي دي أقدر اعدلها لأنها مش مستحيلات ولا صخور يصعب تكسيرها ولا جبال يصعب تسلقها لا طبعا دي نفسك
اقعد مع نفسك وهات ورقة وقلم واقسم الورقة دي نصين
حط في النص الأول عشرين ميزه .
ياااااااااه عشرين ميزه
بتقول ياااااااااه انت مستكتر علي نفسك انك جواك 20 ميزه !!!!! طيب دور وهتلاقي
وحط في النص التاني من الورقة عشرين عيب .
طبعا هترص
طيب تعالي كده وابعد الورقة دي وشوف هتفتكر ايه من العيوب دي واكتبها علي الغايب .. اه اكتبها علي الغايب وشوف اي أول ثلاثة كتبتهم وأبدأ اشتغل عليهم انك تغيرهم .
طيب ازاي ؟؟؟
لو عندك الرغبة الحقيقية صدقني عقلك هيساعدك وهيوجدلك حلول وتبدأ تشوف الدنيا بشكل مختلف وتبدأ تغير من نفسك .
وشويه شويه هتحبها ... اه هتحبها ماهي تستحق انك تحبها
احنا اتولدنا وسبنا نفسنا لغيرنا يهذبها ويربيها وكل واحد اتعامل معاها علي حسب ماتعلم زي الورود الصغيرة كده لما تبدأ تتفتح ويجي الجنايني يراعيها وطبعا كل واحد بيراعي علي حسب معرفته وعلي حسب علمه .
طيب بعد ماكبرنا معقول نفضل سايبنها مع غيرنا وبعد شويه ننقل الملكية لآخرون .... لا طبعا احتفظ بصك ملكيتك لذاتك.. احتفظ بصك حريتك لا بصك عبوديتك
بنتولد ورقه بيضا بيجي الأب والأم حسب تربيتهم واللي اتعلموه يحطوا مبادئ وقائمة ممنوعات وقائمة مسموحات وتيجي المدرسة تكمل ويجي الأصحاب يكملوا وتيجي الميديا تزود ونفضل كده سايبين نفسنا لغيرنا .
بعد مانكبر نبص نلاقينا اخدنا علي العبوديه وصك ملكيتنا لازم يكون في ايد غيرنا علشان يمتلكنا ويحركنا .. طيب ماتحرك نفسك انت وصدقني هاتحركها صح .
ايوه ماحنا اتفقنا ان دي عربيتك وانت اللي هتدورها وتسوقها وانت اللي هتحدد الطريق اللي تمشي فيه اما طريق املس يخليك تمشي وانت مرتاح واما طريق كله مطبات وحفر فتفضل تخبط فيك وممكن جدا تأذي العربية .
ايوه ماهو ده طريق حياتك اما تخليه سلس وأما تعقده وعلي حسب ماتختار تكون صحتك النفسيه والبدنية كمان ماهي أفكارك هي اللي بتكون سلوكك واسلوب حياتك وكل ده راجع لمعرفتك بذاتك .
ماهو لما تعرفها صح هتقدر تغير فيها .. هتغير فكرك .. سلوكك ... أسلوب إدارتك لحياتك .. فتلاقي الحياة بتغير حواليك للأفضل لأنك بقيت من جواك افضل فالداخل ينعكس علي الخارج بالتالي تحب ذاتك وحبك ليها هيساعدك جدا تحب غيرك وتساعده كمان ماهو انت خلاص كده بقيت متحرر بقيت عارف نفسك وامكانياتك ومهاراتك وعيوبك وومميزاتك كمان بقيت تعرف تعالج عيوبك دي وتركز علي مميزاتك اكثر وتبرزها وكل ده هيساعدك تكسب معارف كويسه وتدخل ناس جديدة في حياتك تشبهك بعد التغيير وتساعدك اكثر في طريق حياتك .
بمعني اخر
خرج الماااااارد اللي جواك ... أيوه داخل كل منا مارد ... ربنا خلقنا وخلق معانا كل الإمكانيات المطلوبة للحياة وسخر لنا السموات والأرض ومابينهما يعني سخرلنا الكون والبر والبحر كل ده في خدمتك لكن انت تركت كل ده علشان تبقي حبيس افكارك اللي هي من الأساس مش افكارك هي افكار غيرك اتغرست جواك وآن الأوان دلوقتي تنقح الزرع ده وتشوف البذور السليمة تغذيها والبذور التالفه وتزيلها علشان الثمار الناتجة تكون صحية .
أبدأ بص لنفسك وقدرها ...اعرف قدراتها وامكانياتها ومهاراتها ووظف كل ده لخدمتك ماتكتفيش اني بشتغل وبروح شغلي واخرج منه وخلاص لا شوف نفسك وشوف شغلك ده هل ليه اهميه ؟؟ هل بيحقق لك ذاتك ؟؟
كثير مننا بيشتغل علشان قوت يومه وده مطلب حيوي ومهم جدااااااا لكن جربت تشتغل حاجه بتحبها ؟؟ بلاش جربت بعد شغلك تعمل وتمارس هوايه ليك ؟؟
ماهو مفيش وقت وبرجع تعبان .
تاااااااااني نكبل نفسنا بقيود الظروف والوقت والتعب ماحنا قلنا خرج المارد اللي جواك والمارد ده هيساعدك تعمل أي حاجه في أي وقت طالما انت عايزاها مهما كانت الظروف .
جرب تمارس هوايتك بعد ماترجع الشغل ولو لساعة وشوف النتيجة .
جرب تزود مهاراتك ولو من خلال قنوات اليوتيوب وانت في بيتك واتعلم وأعرف اكثر يمكن تلاقي مهاراتك خدمتك وممكن تلاقي انه مافيش مهاره في الجزئية دي وانك كنت متوهم انك بتعرف تعمل الحاجة دي وتلاقي نفسك عندك مهاره أفضل منها بكثيررررر فتبدأ تنميها .
قيمة ذاتك لاتتحدد بما تملكه من مال ولا بما يكون عليه مظهرك ... ذاتك بما بداخلها من فضائل وقدرات وإمكانيات ونجاحات فلاتربط ذاتك بالمال فالذات المرتبطة بالمال تصل لحد الشح حيث يكون معها المال وشحيحه علي نفسها فلاتعرف طريق لتقديرذاتها ولاتنفق عليها.. فتحرر من فكرة تعلقك بالمال وأنه يصنع المستحيل فأنت من تصنع المال وتسخره لخدمتك وليس هو من يصنع قيمتك فقيمتك تتجلي في خصائصك وصفاتك والتي تنعكس عليك خارجياً فتجعلك تبدو في أجمل وابهي مظهر .
ذاتك ليست في قربك من شخص ولا في التضحيه من اجله فلا تتعلق بشخص فتصبح اسيراً له او عبداً له او تصبح انت مالك له فلا انت تعيش ولا تتركه يعيش بل تصبح حياتكما مسخا وتتلاشي ذاتكما فحرر ذاتك من التعلق بالآخرين وحررهم من التعلق بك ولايعني ذاتك قطع الأواصر والصلات بل تقويتها من خلال التحرر من التعلق فتصبح قادر علي العطاء والحب بشكل اكبر فتجعل دائره عطاؤك تتسع لتشمل أخرين ولاتقتصر علي شخص بعينه .
حرر ذاتك ... حررها من الأفكار المستهلكة التي لاقيمة لها والتي وضعها المجتمع كقيود تكبلك بها وتوارثناها عبر الأجيال ولاعلاقة لها بدينك ولا ترضي بها ربك لأن الله خلقك حر
حرر ذاتك ... حررها من تعلقها بالمال فالمال لايصنع نفساً ولايرفعها ولايعليها بل قد يدنو بها عندما يجعل المتعلق يذل ذاته من أجل الوصول لها فالنفس تعلو بما تملكه من فضائل وطاقات تجعلها تحقق مكاسب ونجاحات وتحقق ثراءاً حقيقيا يجعلها تنفقه بالشكل الذي يناسب صاحبها ويسعده فأنت من تملك المال وليس هو من يملكك .
حرر ذاتك ... حررها من تعلقها بأشخاص بحجة حبك لهم أو ارتباطك بهم فالحب عطاء وليس تعلق ولا امتلاك .
واخيرا ... حرر ذاتك من فكرة العمر والتقدم فيه فالعمر هو رقم والعمر الحقيقي يقاس بما تحققه ويترك اثر وبصمه فقد تكون في الستين من عمرك ولم تقدم عملاً واحد يحقق نجاحا فأنت هنا لا عمر حقيقي لك علي حين قد تكون في العشرينات ولك أعمالا تؤثر في مجتمعات .. العمر ليس رقم ... العمر الحقيقي انجازات ونجاحات والا ماجعل الله حسابنا علي عمرنا فيما أنفقناه .
حرر ذاتك .... تسعد بحياتك
0 التعليقات
